ဇူလိုင် ၁၈ ၊ ၂၀၂၅
GG (VOM)
ဧရာဝတီတိုင်းရှိ ဟင်္သာတ မြို့နယ်၊ ဆိပ်သာမြို့၊ ဓနုဖြူမြို့ နဲ့ ပဲခူးတိုင်းက မဒေါက်မြို့နယ်တွေမှာ မြစ်ရေမြင့်တက်ပြီး စိုးရိမ်ရေမှတ်အထက်ကျော်လာကာ ရေကြီးရေလျှံမှုတွေဖြစ်ပွားနေတယ်လို့ သိရပါတယ်။
ယခုရက်ပိုင်းအတွင်း မိုးရွာသွန်းမှုများပြီး ဧရာဝတီ မြစ်ရေ နဲ့ စစ်တောင်းမြစ်ရေတိုးပြီး မြင့်တက်လာတာကြောင့် ဟင်္သါတမြို့နယ်ထဲက မြစ်ကမ်းနီးအနိမ့်ပိုင်းရွာတွေ ၊ ဆိပ်သာမြို့က အနိမ့်ပိုင်းနေရာတွေ၊ဓနုဖြူမြို့က ကမ်းနားလမ်းဘက် နဲ့ မဒေါက်မြို့က မြစ်အနီးနေရာတွေမှာ ရေကြီးမှုတွေဖြစ်ပွားနေတာဖြစ်တယ်လို့သိရပါတယ်။
လက်ရှိ ဧရာဝတီမြစ်ရေက ဆိပ်သာနဲ့ ဟင်္သာတ မြို့ရဲ့စိုးရိမ်ရေမှတ်အထက်ကို ပေဝက်ကျော် ကျော်လွန်နေပြီး ၂၄ နာရီအတွင်းမှာ နောက်ထပ် ၂ ပေမှ ၃ ပေခန့်အထိမြင့်တက်လာနိုင်ကြောင်း ၊ စစ်တောင်းမြစ်ရေသည်လည်း မဒေါက်မြို့ရဲ့စိုးရိမ်ရေမှတ်အထက် ၁ ပေခန့်ကျော်လွန်နေပြီး ၂၄ နာရီအတွင်းမှာ နောက်ထပ် ၃လက်မခန့်မြင့်တက်လာနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက ဒီနေ့ထုတ်ပြန်မှုအရသိရပါတယ်။
” မြစ်ရေက ထပ်တိုးနေတယ် ။ ဟင်္သာတမှာ မနေ့ကတည်းကရေကြီးနေတာ။ကမ်းနားဘက်တွေနဲ့အနိမ့်ပိုင်းဘက်တွေ၊မြစ်နဲ့နီးတဲ့အနိမ့်ပိုင်းတွေရေဝင်နေတာ။ဒီနေ့မနက်လည်း ဟင်္သာတ မှာမိုးကတအားကောင်းနေတော့ မြစ်ရေကထပ်တိုးနေတာပေါ့။ ဓနုဖြူဘက်မှာဆိုလည်း ကမ်းနားမှာရေတက်နေတယ်။ ” လို့ ဟင်္သာတ ဒေသခံက ပြောပါတယ်။
အဆိုပါ မြို့တွေမှာ မြစ်ရေက စိုးရိမ်ရေမှတ်အထက် ဆက်လက်မြင့်တက်ပြီးရှိနေနိုင်သေးတာကြောင့် မြစ်ကမ်းအနီးနဲ့ မြေနိမ့်ပိုင်း နေထိုင်သူများအနေနဲ့ ရေဘေးလွတ်ရာနေရာကို ရှောင်ရှားကြဖို့ မိုး/ ဇလမှသတိပေးထားပါတယ်။
နောက်ထပ် ၂၄ နာရီကနေ ၄၈ နာရီအတွင်းမှာလည်း ဧရာဝတီတိုင်းရှိ ဇလွန် ၊ မအူပင် ၊ ငါးသိုင်းချောင်းမြို့နယ်နဲ့ ပဲခူးတိုင်းက တောင်ငူမြို့နယ်တွေမှာ မြစ်ရေမြင့်တက်လာပြီး စိုးရိမ်ရေမှတ် ကိုရောက်ရှိလာနိုင်တယ်လို့ သိရပါတယ်။
လက်ရှိမှာ ဧရာဝတီမြစ်ရေက ဇလွန် မြို့ရဲ့ စိုးရိမ်ရေမှတ်အောက် ၃ လက်မခန့်မှာ ရောက်ရှိနေပြီး ၂၄ နာရီအတွင်းမှာ မြစ်ရေက မြို့ရဲ့ စိုးရိမ်ရေမှတ်ကို ရောက်ရှိနိုင်တယ်လို့သိရပါတယ်။
ငဝန်မြစ်ရေသည်လည်း လက်ရှိ ငါးသိုင်းချောင်း မြို့ရဲ့ စိုးရိမ်ရေမှတ်အောက် ပေဝက်ခန့်မှာ ရောက်ရှိနေပြီး ၄၈ နာရီအတွင်းမှာ မြို့ရဲ့ စိုးရိမ်ရေမှတ်ကို ရောက်ရှိနိုင်တယ်လို့ မိုး/ဇလက ဆိုထားပါတယ်။
အလားတူ တိုးမြစ်ရေကလည်း မအူပင်မြို့ရဲ့ စိုးရိမ်ရေမှတ်အောက် ၁ ပေခွဲကျော်မှာရောက်နေပြီး ၂၄ နာရီအတွင်းမှာ ဒီရေမြင့်တက်ချိန် စိုးရိမ်ရေမှတ်ကိုရောက်ရှိလာနိုင်တယ်လို့သိရပါတယ်။
စစ်တောင်းမြစ်ရေသည်လည်းလက်ရှိမှာ တောင်ငူ မြို့ရဲ့ စိုးရိမ်ရေမှတ်အောက် ပေဝက်ကျော်မှာ ရောက်ရှိနေပြီး ၂၄ နာရီအတွင်းမှာ စိုးရိမ်ရေမှတ်ကို ရောက်ရှိနိုင်တယ်လို့သိရပါတယ်။
ဒါကြောင့် ဇလွန်မြို့နယ်၊ တောင်ငူမြို့နယ်၊ မအူပင်မြို့နယ်နဲ့ ငါးသိုင်းချောင်းမြို့အတွင်းရှိမြစ်ကမ်းအနီး၊ မြေနိမ့်ပိုင်း နေထိုင်သူတွေ အနေနဲ့ ကြိုတင်သတိပြုဖို့ မိုး/ဇလမှ သတိပေးထားပါတယ် ။
ဓာတ်ပုံ – အောင်ကိုကို
